آآآآآآآآآآآه يا مصر

أبريل 16, 2008

مش عارف احكيلكم عن ايه و لا ايه

 

ابتدي منين و لا اقف فين

مشاعر مختطلة كثيرة جدا كلها جواي

حزن و الم و مرارة ظلم و فخر و رضا و سكينة و غضب

مرارة مالية حلقي من ظلم بين واقع على والدي و 25 كلهم ابائي

حزن على حال بلد بيتسرق

الم على احلام بيغتالوها

فخر ان والدي هو صادق الشرقاوي

فخر اني اعتقال والدي خلاني اعرف خيرت الشاطر و يعتبرني ابنه

الم و انا شايف دموع اختي الصغيرة الحامل و هي نازلة على خدها و مش قادر اعملها او اقولها حاجة تخفف عنها

غضب من نظام مذعور بيخاف من زهراء الشاطر و يزعقلها و يخاف من خديجة حسن مالك و يضربها

Khadiga

و يترعب من اروى فرحات الطفلة الصغيرة و يجري وراها و يضربها

مش عارف و الله احكي على ايه و لا ايه

احكي على همجية الامن و سعار الضباط

اللي خلى الدنيا كلها تتاكد قد اي النظام ده مرعوب من ردة الفعل

لانه عارف انه ظالم و مستبد علشان كده مرعوب كعادة الظالم لما لا يجد حجة و لا منطق يتكلم بيه

فلا يعرف الا لغة الضرب و الهمجية و الاعتقال

عشرات من الاخوة بيضربوا و يعتقلوا

و شوية انا ماشي الاقي خديجة مالك بتعيط تسالها سمية اختي في ايه

تقولها اعتقلو احمد اخوي

قعدنا نلف كل شوية بالعربية

و شوية بكلم ماما جيهان في التليفون زوجة عمو حسن مالك

لقيتها بتعيط و بتقولي اعتقلوا  احمد و حمزة و ضربوهم و ضربوا خديجة

سكت مش عارف اقولها ايه غير اني كنت بعيط معاها

شوية و مريم جمال تاج الدين كلمت سمية اختي قالتلها بابا اتاخد و انا مش عارفة اعمل ايه

سمية قالتلها تعالي معانا

و لقينا مريم هي كمان جاية معيطة

شوية جالي خبر اعتقال 2 اعز علي من اخواتي احمد حنفي و احمد نادر

كلمت احمد نادر في  التليفون قالي احنا في عربية الترحيلات و كلمت حنفي و مقدرتش

عيطت

ما بقتش عارف اعيط على ايه

على ابوي اللي قلقان على الحكم عليه

و لا على اخواتي البنات اللي اتضربوا و اتشتموا و انا مش واقف

و لا على الاخوة اللي اعتقلوا

و لا على مرارة الظلم اللي ملت حلقي و خنقتني

و انا بحاول فهم هم الضباط دول جنسهم ايه بشر و لا حيوانات

و لا جنسيتهم ايه مصريين زينا و لا احنا اللي مش من البلد دي و لا ايه

لما اتفرقت الناس و اتضرب الاهالي و الصحفيين و الاخوة المتضامنين

مشينا و بعدنا عن مكان المحكمة و قعدنا نلف بالعربية و كلمت نادر تاني قالي ان عمو جمال كان معاهم في عربية الترحيلات و نزل هو و الصحفيين

و ان العربية مشيت بيهم من المنطقة العسكرية

الغربية ان نادر المعتقل كان بيكلمني من جوة عربية الترحيلات علشان هو اللي يطمن علي و على الاحكام

المهم بعدنا عن المحكمة و ابتدى الاهالي يتجمعوا بعيد عن المحكمة علشان يطمنوا بعض

كل ما نجمع في حتة يجي الامن المذعور المرعوب يجري يمشينا منها

و قفنا بعيد خالص عن المحكمة عند مدرسة رجاك و كان معنا الدكتور محمود غزلان عضو مكتب الارشاد اللي لسه خارج من السجن

و جه الامن يجري يلا من هنا امشو من هنا

الدكتور غزلان احنا مش هنمشي دول اخوتنا و اهلنا اللي بيتحاكموهم جوه

الدكتور غزلان المعروف عنه هدوءه الشديد و ادبه لقيته منفعل جدا

و كلاب الشرطة لا يقيمو وزن لكبير و لا صغير

الضابط قاله لو ما مشتوش من هنا هنعتقلكم

لقيت الدكتور فاتح الجاكت و قاله انت فاكر هنخاف كده خدنا يلا انا لسه خارج من السجن

و الضابط قال للعساكر شيلوه يلا ارموه في العربية لولا ان الواقفين تدخلو وبعد الضابط عنه

لكن موقفه و عدم خوفه زي كتير من الاخوان يومها هزني جدا

الرجالة طول عمرهم رجالة

المهم اتحركنا تاني ووقفنا عند مسجد و عقبال الامن ما جه كنا دخلنا المسجد علشان نصلي الظهر

كل ده و لسه ما كناش نعرف اي حاجة عن الاحكام

و فضلنا هناك بقى

و لقيت هيثم مناع كان مذهول من طريقة تعامل الامن مع الاهالي

و جالنا من نجا من الحرب من الصحفيين

و جت قوات الامن و العساكر و طوقوا المسجد

وقفنا مستنين الاحكام

المحامين ممنوعين من دخول المحكمة

المحكمة انعقدت و اصدرت احكامها في سرية شديدة منعت حتى محامي يدخل يجيب نسخة من القرار

في سابقة لم تحدث حتى في تاريخ المحاكم العسكرية

و ده اكبر دليل على رعب النظام و خوفه

لانه لو كان عادل في احكامه ليه خايف من الاهالي و الصحفيين و المحامين

الساعة 2 ظهرا و لسه مفيش خبر

ماما جيهان تعبانة جدا جدا و و تقولي انا حاسة اننا مش في بلدنا

هم بيعملو معانا كه ليه تقولي كده و هي بتعيط

و وصلت الاحكام

سربها امن المحكمة للمحامين برة

ووقفنا نسمع الاحكام على ابائنا

مش قادر اوصف اللحظة دي

لقيت هند شوشة وقعت على الارض لما عرفت ان ابوها اخد 5 سنين و قاعدة تعيط

بنات الشاطر دموعهم مغرقة النقاب

خديجة مالك مش قادرة تتماسك و قاعدة تعيط و اخوتها هدو فيها

 

 

بنت عصام حشيش زي كل الناس اللي وقفت دموع الظلم و القهر غرقت وشهم 

حتى اللي ابائهم اخدو براءة كانو بيعيطو زينا

طنط امال زوجة احمد النحاس اللي اخد براءة كل ما تسمع لاحكام على حد من عليتنا الكبيرة تعيط

احمد محمد بليغ االي ابوه اخد براءة اخدني بالحضن و كان بيعيط اكتر مني

فاطمة بليغ قعدت على الارض تعيط

مصطفى عصام عبدالمحسن ده بقى لسع

لقيت سمية اختي الصغيرة قاعدة تعيط اخدتها في حضني و انا مش عارف اقولها ايه

بس والله و الله و الله

مصر هتفضل غالية علي

و الله ما احنا سايبنها للحرامية

عاطف الحسيني………الملف الاسود

يناير 26, 2008

 اضغط على الصورة لفتح الملف الاسود على انسى

من الاولى

يناير 21, 2008

صادق الشرقاوي الانسان

يناير 8, 2008

فيلم قصير يظهر الجانب الانساني من حياة والدي

عندما نعبد لمصلحة

يناير 3, 2008

كثير من الناس الذين عرفوا طريق الله و تعلموا فيه الكثير و ذاقوا فيه حلاوة الطاعة

عرفوا ما يسميه العلماء ببركة الطاعة و شؤم المعصية

فمن بركة الطاعة نور في الوجه و انشراح في الصدر و توفيق لطاعة اخرى و بركة في الرزق و العلم و الحفظ و الوقت و غيرها

و من شؤم المعصية ظلام في الوجه و ضيق في الصدر و تركك لنفسك و محق لبركة الرزق و العمر و صعوبة الحفظ و غير ذلك

و قد قال لي احد اساتذتي مرة ان الاصل اننا نعبد الله خالصا لوجهه لانه الوحيد المستحق للعبادة او نعبده لنطلب الجنة او لخوفنا من النار و هي كلها امور غيبية لذا جعل الله هذه البركة و الشؤم ليسهل لنا الطاعة

قد لا تكون مشكلة كبرى ان نترك المعصية لا خشية من الله او استحيائا منه او حتى خوفا من جهنم

لكن نتركها فقط خوفا من شؤمها و خوفا على رزقنا

لكن المصيبة ان نعبد الله طلبا للبركة فقط

هنا المصيبة و الطامة الكبرى

و هذا ما اسميه عبادة لمصلحة

المثال الفج على هذه الطريقة  في العبادة

ايام الامتحانات ترى الطالب يحافظ على الصلاة على مواقيتها و يدعو الله بحرارة ان يوفقه

حتى اذا انتهت الامتحانات عاد الى سابق عهده مع الله

قد لا يعني بالضرورة انه عاد الى المعصية الشديدة لكنه لم يعد بنفس الطاعة اللتي كان عليها

و غير ذلك  من ازمات او مفارق طرق في حياة الناس

و هذه ليست دعوة للا نلجا الى الله في اوقات الشدة لكنها دعوة ان يكون لنا حال مع الله

و لا نتعامل مع الله بعبادة لمصلحة ففي هذا اساءة ادب شديدة مع الله

و لا اتحدث هنا عن صلاة الحاجة لكن اتحدث عن الحال عموما

و لا تنسى انك يا مسكين لا يمكن ان تستغني عن الله

يا مسكين انك تعيش في خيره و وفوق ارضه و تحت سمائه

لحم اكتافك و اكتاف ابيك و ابنك من خيره كيف لك ان تدير وجهك عنه في كل احوالك

و مآلك و مصيرك اليه سبحانه

يقول ربنا عز وجل”هو الذي يسيركم في البر والبحر حتى إذا كنتم في الفلك وجرين بهم بريح طيبة وفرحوا بها جاءتها ريح عاصف وجاءهم الموج من كل مكان وظنوا أنهم أحيط بهم دعوا الله مخلصين له الدين لئن أنجيتنا من هذه لنكونن من الشاكرين (22)فلما أنجاهم إذا هم يبغون في الأرض بغير الحق يا أيها الناس إنما بغيكم على أنفسكم متاع الحياة الدنيا ثم إلينا مرجعكم فننبئكم بما كنتم تعملون(23)”
سورة يونس الايات 22 و 23

معنا سيد عبدالله صادق

ديسمبر 29, 2007

الحوار الكامل في برنامج “مباشر مع” مع الاستاذ حازم صلاح ابو اسماعيل عضو هيئة الدفاع عن الاخوان اللاربعين المدنيين المحالين ظلما للمحكامة العسكرية من رموز الاصلاح

جزء من الحلقة به مداخلتي التليفونية على البرنامج

و تستمر الحياة

ديسمبر 27, 2007

العنوان ده كتبته من اول ما بدات التدوين

لكن كل مرة ابتدي اكتب فيه اخاف و اكتب في حاجة تانية او ما اكتبش خالص

و كل مرة والدي يكلمني في هذا المعنى ازعل و احاول اغير الموضوع او اتشاغل او اي حاجة

لكن مهما كانت الحقيقة دي مؤلمة الا انها هتفضل هي الحقيقة اي كانت قساوتها

اشخاص كثير كنا فاكرين ان الحياة ما تستمرش من غيرهم

و ناس تانية كانوا هم نفسهم فاكرين ان الحياة هتوقف بغيابهم

لكن هتفضل الحقيقة القاسية على الكل

ان الحياة لا تقف لأحد كائن من كان

ناس احسن من جدتي رحمها الله توفوا و لم تقف لهم الحياة

ده الرسول نفسه صلى الله عليه و سلم لما توفى لم تقف الحياة و لا الدعوة

و كثير من كبار الصحابة اصيبوا بالذهول او بالصدمة

لكن اقرب الناس اليه صلى الله عليه و سلم ابو بكر رضي الله عنه

كان اول من ادرك هذا المعنى

و ناس يمكن احسن من والدي اعتقلوا و لم تقف لهم الحياة و لم تقف لهم الدعوة

فهي لم و لن تقف تنتظر احدا يبكي

لا يستطيع احد ان ينكر اختلال حياته بعد اعتقال ابيه

او ينكر اختلال دولاب العمل بعض الوقت في الاخوان

لا يستطيع احد ان ينكر علي اذا بكيت فراق ابي و حرماني منه

لا يستطيع احد ان ينكر علي شعوري بمرارة الظلم تملئني

لا يستطيع احد ان ينكر على هديل بنت اختي و هي تبكي و تقول لي ” مش عايزة جدو يروح السجن”

لكن علينا ان نلحق بقطار الحياة بالرغم من المنا و مشاعرنا

تمام يا فندم :مكتوب عليها بنحب مصر

ديسمبر 16, 2007

اسر المعتقلين واقفين قدام المجلس القومي لحقوق الانسان

و حوالينا مجموعة كبيرة من الضباط ووسطنا مجموعة اكبر من المخبرين رايحين جايين وسط الاهالي

وكل واحد منهم ماسك تليفون او لاسلكي و قاعد يرفع التقرير للجهة اللي هو تابع ليها

dsc02153.jpg

واحد من الاهالي كان واقف جنب انس حسن مالك بيحكيلي:

واحد من المخبرين اخد الطاقية من انس حسن مالك

 

dsc02103.jpg

و ماسك التليفون

“ايوا يا فندم مكتوب عليها مش هنبطل و مش هنسافر و مش هنسيب و مكتوب كمان بنحب مصر و مكتوب لا لمحاكمة المدنيين عسكريا..

لا لمحاكمة المدنيين عسكريا..

لا لمحاكمة المدنيين عسكريا..

لا لمحاكمة المدنيين عسكريا..”

الطاقية اصلا بعد كده متكرر عليها كتير الكلمة دي و المخبر قعد يكرر هو كمان

حساسية

ديسمبر 11, 2007

لا مش اللي بتخلي الواحد يصاب بعطس او حكة

 اقصد الحساسية من الاحساس العالي

اخر مرة كنت مع والدي في المستشفى و دخل علشان يعمل الرنين المغناطيسي

rad_pic_san.jpg

طبعا الجهاز حاجة شبه اللي موجود في الصورة بس اللي في المستشفى الجامعي اقدم منه و الفتحة اللي بتدخل فيها بجسمك اضيق من كده

و قعد وقت طويل جوه لان كان بيعمل اشعة على فقرة فقرة

انا كنت دخلت مرة من زمان في واحد من الاجهزة دي بس كان في دقائق و كان بيعمل اشعة على المخ بعد حادثة حصلتلي زمان

المهم بابا خرج من غرفة الاشعة ووشه مقلوب و شكله غريب حتى اني افتكرت ان ضهره وجعه من طول المدة

المهم رجع بابا السجن و انا روحت بعديها باكتر من اسبوع كنت قاعد مع والدي في الزيارة و عرفت سر القلبة اللي حصلت بعد ما خرج من الاشعة

بيقولي انه قعد ما يقرب من 45 دقيقة قي الجهاز ده الفتحة ضيقة جدا بحيث اني ايدي لازم تبقى طول الوقت مفرودة على جنبي ما اقدرش حتى اتنيها و سقف الانبوبة قريب جدا من وشي بحيث اني لو رفعت وشي حاجة بسيطة مناخيري تخبط فيه

المشكلة ان ده فكره بالقبر و الموت و اذا كان هو مستعد و لا لا

انا كنت دخلت الانبوبة دي و ما حستش بحاجة من اللي والدي بيحكي عليها

هي دي الحساسية اللي بحكي عنها

الحساسية اللي تخلي واحد بيتوضى بمية سخنة يتلسع يستعيذ بالله من حميم جهنم

اللي تخلي واحد يشوف منظر جميل يحبس انفاسه يتسائل اذا كان ده في الدنيا  يبقى الجنة هتبقى عاملة ازاي اذا كان اقل واحد فيها بياخد  اضعاف اكبر ملك من ملوك الدنيا

 و لما يدوق اكلة حلوة يدعي ربنا انه يرزقه من طعام اهل الجنة اللي في كل قطمة منه 70 طعم مختلف

هي دي الحساسية

حساسية المؤمن اللي قلبه مش محتاج يشوف حد بيموت او هو نفسه تجراله مصيبة علشان يفتكر ربه

مرتبط بالاخرة بحيث ان اصغر حدث في حياته بيفكره بالاخرة

عن الورد برس اتحدث

ديسمبر 6, 2007

اكثر من واحد سئلني عن سبب اختياري للورد برس

لان معظم المدونين الشباب اللي اعرفهم على بلوجر

و الكبار على مكتوب

و كان اول واحد اعرفه عمل مدونة على الورد برس أ/احمد عبدالحافظ

بس هو ما كملش تدوين و نفسي يكمل

على كل حال في شوية حاجات في الورد برس بتميزه كثير عن البلوجر و غيره

اهم حاجة بتميزه هي احصائياته التفصيلية

picture2.jpg

اضغط على الصورة للتكبير

الصورة الساعة 8 صباحا علشان كده لسه مفيش احصائيات لليوم لسه

و الرسومات البيانية رسومات للزيارت للمدونة بمقياس يومي او اسبوعي او شهري

و كمان رسومات لكل تدوينة بالتحديد

و احصائيات تبين refers اللي هي الزيارات اللي جت للمدونة من خلال الضغط على لنك في مكان تاني

يعني لو في حد حط لنك للمدونة يبان عندي كام زيارة جت من اللينك ده

و كمان في احصائية بيتين الناس اللي جت عندي من خلال محركات البحث

يعني لو حد عمل بحث عن كلمة براحتي و دخل عندي بعرف

و من خلال النوع ده من الاحصائيات اكتشفت حاجة طريفة

ان في اكتر من واحد دخل عندي لما عمل بحث عن كلمة جواز او عايز اجوز او عايز بنت للجواز او حاجات على الوزن ده يجو عندي لان اول تدوينة كنت كاتبها عن الجواز

و كمان في احصائية بتبين الناس اللي دخلت عندي اذا كانت فتحت اي لنك من اللي موجودين في المدونة

و في احصائية بيتين اكثر التدوينات زيارة عندي في خلال اليوم اللي فات او الاسبوع او الشهر

و دائما في الصفحة الرئيسية بتاعت المدون فيها الجديد سواء عندك في المدونة او في الورد برس كله

picture1.jpg

اضغط على الصورة للتكبير

يعني بيقى فيه على اليمين اعلى مدونات في نسبة الزيارات

و في اكتر التدوينات زيارة في الورد برس عموما

و في المدونات الاسرع صعودا في عدد الزيارات و انا بتحط في القائمة دي لما ابعت رسائل لما يكون ي حاجة مهمة

و غير كده في مكان كتابة التدوين في حاجتين tags و categories

الاولى موجودة في البلوجر اللي هي التصنيفات يعني مثلا تصنيف المحكمة يبقى كل المواضيع بتاعت المحكمة اللي على المدونة

الثانية دي التصنيفات بس في الورد برس كله يعني لو عملت تصنيف المحكمة يبقى كل مواضيع المحكمة اللي على اي مدونة

غير مميزات تانية زي انك ممكن تعمل import لكل محتويات مدونة تانية بتاعتك على بلوجر مثلا

او العكس تعمل export لمحتويات المدونة لموقع تاني

و ممكن كمان تعمل كلمة سر لتدوينة معينة