Archive for 23 سبتمبر, 2007

بعض من عرفت قبل الاعتقال: عرفته في رمضان

سبتمبر 23, 2007

 

كل مرة اروح لبابا زيارة في المعتقل افتكر قول النبي صلى الله عليه و سلم: (الانبياء اشد بلاء ثم الامثل فالامثل) لان كل اللاخوة المعتقلين مع والدي كلهم احسن من بعض واحس فيهم فعلا باصطفاء ربنا ليهم

 

انا عرفت بعضهم قبل الاعتقال بس معظمهم كنت اعرفهم على انهم اصدقاء والدي او عرفت اولادهم

 

بس اللي هتكلم عليه هو الوحيد فيهم اللي عرفته شخصيا و قربت منه جدا في رمضان

 

كنت طالب في ثانوي و كان اول مرة اعتكف اعتكاف كامل

 

كنا معتكفين في مسجد بدورين و مكان نومنا كان فوق و الصلاة تحت

 

و الحقيقة الواحد في السن ده بتبقى مشاعره مرهفة جدا جدا و لما بيحب بيحب قوي و لما بيكره بيكره قوي

 

علشان كده اللي ربنا بيرزقه التزام و صحبة صالحة في الوقت ده بيحس بمشاعر وايمانيات يمكن ما يقدرش يسترجعها تاني طول عمره

 

ما علينا كنا في الاعتكاف و كنا بنتسابق مين اللي يلحق الصف الاول بس دايما مهما نزلنا بدري

 

بنلاقي في واحد اسمر سبقنا قاعد و حاطط و ماسك المصحف في ايده و مستني الادان

 

تلاقيه كده في كل الصلوات حتى العشاء ما تفهمش هو كان بياكل امتى

 

اتعرفت عليه بس دايما كنت بلاحظ ان عينه حمرة

 

في الاول كنت بفتكر ان عينه تعبانة و بعدين افتكرت انه من قلة نومه

 

بس الحقيقة لما بقيت بصلي جنبه عرفت السبب

 

كان دايما بيبكي بكاء شديد و هو بيصلي التراويح او التهجد

 

و افتكر قول النبي صلى الله عليه و سلم : عينان لاتمسهما النار منهما عين بكت من خشية الله

 

و تلاقيه بعد التهجد يتسحر بسرعة و ينزل يققعد الدقائق اللي قبل الفجر و يقعد يدعي و يبكي كانه طفل او كانه بيتوب من قتل واحد

 

لما كنت تقف جنبه في الصلاة ابقى متغاظ قوي

 

انا بقعد ادعي ربنا ان ربنا يرزقني عين دامعة من خشيته و اركز و احاول و هو اول ما تيجي ايات مؤثرة الاقيه ساح جنبي من العياط

 

كنت بغبطه فعلا

 

اتعرفت عليه كويس و بقينا اصحاب و بقى لما يلاقيني طولت في السحور يجيلي يقولي يلا هناكل كتير بعد رمضان بس الدقايق دي غالية قوي

 

و ينزل قبل الفطار علشان يقعد مكان في الصف الاول و يجبلي تمر علشان افطر عليه

 

المهم فضلت علاقتي بيه حب في الله مفيهاش اي مصالح

 

ما كانش ساكن عندنا في المنطقة بس كان بيجي يعتكف معانا

 

و بعدين جه الامن في سنة من السنين كان عايز يمنع الاعتكاف كعادته في محاربة كل حاجة كويسة

 

المهم فضلوا ادارة المسجد في مفاوضات مع ابطال امن الدولة لحد لما وصلوا معاهم ان اي حد مش من المنطقة يمشي

 

و امن الدولة كان ليهم سوابق مع المسجد ده كانوا جم اعتقلوا ناس من وسط المسجد

 

المهم مشوا فعلا الناس اللي من برة المنطقة و مشي صاحبي معاهم

 

ياااااااااااه

 

ساعتها افتكرت قول ربنا

 

ومن اظلم ممن منع مساجد الله ان يذكر فيها اسمه و سعى في خرابها

 

و بيقت بقابل صاحبي من وقت للتاني و نكلم بعض في التليفون

 

لحد لما جه خبر اعتقال والدي و لما قعدت على النت اقرا اسامي المعتقلين

 

كانوا كلهم كبار في السن ما عدا صاحبنا ده

 

محمد مهنى

 

اصغر واحد في القضية العسكرية

 

لسه فاكر اول مرة رحت ازور والدي لما كان في سجن المحكوم و قابلت مهنى و لقيته قاعد مع زوجته

 

و احنا خارجين التفت كده لقيت النقاب بتاع زوجة محمد مهنى متغرق من العياط

 

آالمني المشهد ده جدا و قلت حسبي الله و نعم الوكيل في اللي فرق بين الزوج و زوجته

 

اشهد الله اني احبك في الله يا محمد

 

و اسال الله ان يجمعني بك في الدنيا قريبا على خير

 

و يجمعني بك في الاخرة في مستقر رحمته و تحت ظل عرشه يوم لا ظل الا ظله

 

و يفك اسرك و اسر ابي و اسر كل مظلوم

 

 

انا متضامن مع عادل حمودة

سبتمبر 20, 2007

1_101626_1_3.jpg

بكره كتابته جدا من ايام ما كان ماسك مجلة روزاليوسف و بعد ما سابها و مسك جريدة الفجر

و هو من اسوا من يكتب عن الاخوان

و يا ما كتب عن خيرت الشاطر و اخوانه بكلام سيئ جدا

و لم يقف معانا في المساحة حتى المشتركة اللي بينا و هي المفروض الحريات

و قعد يكتب عننا و كاننا نستحق الاحالة للمحاكمة العسكرية

و حتى لو كان في ناس اشارت انه اتحط في القضية من باب الديكور

و حتى لو كان حتى على المستوى الشخصي و الانساني لم يبد اي تعاطف معانا لما قابلناه في نقابة الصحفيين امبارح على عكس الثلاثة التانيين اللي معاه في نفس القضية

لكن انا متضامن معاه لانني ارفض الظلم اي كان شكله

و ارفض ان يظلم اي احد حتى لو كان مختلف معي بشدة بل و يحاربني

انا ارفض الظلم لان من مقاصد الشريعة الرئيسية كما قال الشيخ القرضاوي

اقامة العدل في الارض

فكما نعيد ليل نهار بأن الخصومة السياسية ليس مكانها ابدا قاعات المحاكم او السجون

انما مكانها الحلقات النقاشية و النزول الى الشارع و الاحتكام الى صناديق الاقتراع

لذا انا ضد حبس اي سجين راي حتى لو اختلف معي

لذا انا متضامن مع عادل حمودة

و بالطبع ابراهيم عيسى و عبدالحليم قنديل و وائل الابراشي

و ايمن نور و اي معتقل ظلما و طغيانا

بكيت من غير ما ادعي

سبتمبر 20, 2007

لالا ده مش رياء و لا نفاق و لا حاجة لاني بكيت شفقة مش خشوع او ندم

اكثر من مرة اروح المحكمة العسكرية و ارفع ايدي بعد ما نصلي الضهر و مقدرش اامن على اغلب الدعاء

بالذات دعاء الدكتور امير بسام انا بعيط صحيح بس مش من خشوعي لا من اشفاقي على الناس اللي بندعي عليهم

بيقعد يدعي دعاء شديد قوي

يقول اللهم احرق قلوب اعز من لديهم عليهم و احرق قلوبهم على اعز من لديهم

و يقول اللهم ابتليهم بداء بلا دواء و مرض بلا شفاء و ابتليهم بامراض لم تكن في اسلافهم

و يقول اللهم كما فرقوا بيننا و بين ابنائنا فرق بينهم و بين ابنائهم

انا مش بقدر اامن على الادعية دي بسكت و بعيط لانهم بيصعبوا علي

انا منكرش انهم مشتركين في الاثم

كلهم من اول اللي قاعد يتصنت علينا و يشوف احنا هنوزع كام شنطة رمضان و لا هنحفظ الاطفال اي جزء من القران

للضابط اللي اعتقل ابائنا الى اللي بيصدر الاوامر

ربنا بيقول: “ان فرعون و هامان و جنودهما كانو خاطئيين” بس انا مشفق عليهم من الدعوات دي

و النبي صلى الله عليه و سلم في مواقف اشد من دي رفض يدعي على قومه

و المرات اللي دعا فيها على ناس في السيرة محدودة على حد علمي

لكن كان بيغلب عليه الشفقة و الرحمة بيهم

انا مش هيفرحني موت عاطف الحسيني على هذا الظلم قد ما هيفرحني لو تاب الى الله و رجع عن اللي بيعمله

و مش بعيدة على ربنا

و ما تنسوش الصحابي اللي قال : لو اسلم حمار الخطاب ما اسلم عمر بن الخطاب

من شدة ايذائه و محاربته للنبي و الصحابة

و حتى لو ما تابش انا محبش ان اولاده يتعرضوا للي انا اتعرضتله زي ما عمو امير بسام بيدعي

و على العموم دي مدارس و انا مقدرش انكر على حد دعائه لاننا بندعي رب عادل و مجيب

لكن انا بشفق على ناس المفروض انهم قومنا و مننا حتى لو اذونا

بشفق عليهم من دعوة مظلوم ليس بينها و بين الله حجاب و من اناس نحسبهم صالحين و في ايام مباركات

الف سلامة عليكم

سبتمبر 20, 2007

1picture-003.jpg

 

والدي عنده التهاب في اعصاب قدم

نتيجة لمضاعفات السكر وبسبب سوء الرعاية الصحية داخل السجون

 

ادعوا له بالشفاء العاجل

و الف سلامة عليك يا حاج

1.png

 

ياسمين محمد حافظ

بنت د/محمد حافظ احد المحالين للمحاكمة العسكرية

جالها برد و بقى نزلة شعبية و بعدين بقى التهاب رئوي

دخلت على اثره العناية المركزة

الف سلامة عليكي

حما الدكتور محي الزايط المعتقل حاليا مع الدكتور عصام العريان في العانية المركزة

اسال الله العظيم رب العرش الكريم ان يشفيكم جميعا و يشفي مرضى المسلمين

اللهم اجعل مرضهم رفعا لدرجاتهم و تكفيرا عن سيئاتهم

اللهم اشفي مرضانا و مرضى المسلمين

فخور انك ابي

سبتمبر 15, 2007

 

dsc05256.jpg

بابا اول واحد على اليمين

بابا في افطار الاخوان السنة اللي فاتت مع ا\علي نويتو و محمد البشلاوي

 

حاسس بفخر ان انت والدي

مجروح و زعلان صحيح

بس فخور انك ابي

قرفان من الظلم و اللي ساكتين عليه

و قرفان اكتر من اللي بيهللوا للظالم

بس فخور انك ابي

حاسس بمرارة ملياني من الظلم اللي واقع عليك

بس فخور انك ابي

فخور ان ربنا اصطفاك انك تمشي على خطى النبي صلي الله عليه و سلم و كل اصحاب الرسالات

فخور ان انت مشيت في نفس طريق ناس اتكتب اساميهم بحروف من نور في التاريخ اعتقلوا لفترات طويلة

فخور ان اسمك اتكتب في لوحة الشرف مع كل المناظلين زي خيرت الشاطر و عصام العريان و ايمن نور

فخور انك بتدفع ثمن الحرية اللي بتطالب بيها

بمشي في كل حتة اقول ان والدي صادق الشرقاوي نفسي اقول للعالم كله لاني عارف اني بحمل قضية عادلة

فخور انك وقفت في وجه الظالم و قلت لا

فخور ان اسمي مقترن باسمك

بابا انا بحبك قوي

بابا انت واحشني قوي قوي

بابا انا فخور جدا جدا جدا انك والدي

رمضان جه و بابا مجاش

سبتمبر 13, 2007

كل سنة و انتم طيبين
انا تعبان قوي لان بابا مش معانا دلوقتي
نفطر سوا و ننزل نصلي التراويح
و يصحينا للسحور
و يشجعنا في العشرة الاواخر على الاعتكاف
يااااه بابا واحشني جدا
صعب علي قوي ان احضر الافطارات العائلية و بابا مش معايا
حسبي الله و نعم الوكيل في اللي حرمني من ابوي انه يبقى معانا في رمضان
بالله عليكم ادعوا في رمضان ان ربنا يفك اسر ابوي و اسر كل مظلوم
ادعوا ان ربنا يرفع عن مصر البلاء و الغلاء
ادعوا ان ربنا يرحم الامة في كل مكان
في فلسطين و العراق و افغانستان و لبنان و كل مكان
و ادعولي ان ربنا يهديني و ياخذ بيدي
غالبا هشوفكم بعد رمضان ان شاء الله