Archive for 28 نوفمبر, 2007

ايه اللي جابك

نوفمبر 28, 2007

1_678117_1_34.jpg

  

يوم الثلاثاء حضرت الجلسة الحاجة و تلاتين المحكمة العسكرية

و ايه الغريب في كده يعني؟

اصل انا والدي من ساعة ما تعب و بطل يحضر الجلسات و انا غالبا مش بقدر اروح المحكمة

يا اما لاننا بقينا غالبا بنزور والدي في السجن يوم الجلسة او احيانا والدي بيروح المستشفى في نفس يوم الجلسة

انا كنت مدايق اني مش قادر احضر المحكمة

انا في الاول كنت بحضر لكذا سبب اهمها اني اكون جنب والدي و الاخوة اللي معاه

بس كان برضه بيبقى في نوع من الفضول اني اشوف شكل المحكمة اللي فعلا عبارة عن مسرح حقيقي

الكراسي و المنصة و النظام الصوتي حتى الاضاءة اضاءة مسرح الحاجة الزيادة هي القفص الحقير ده

و كنت بحضر علشان اشوف احداث الجلسات بس بعد كده كانت الحاجة الوحيدة اللي بروح علشانها هي الدعم المعنموي لوالدي و لكل اللي معاه لان احداث المسرحية مملة بشكل غير عادي و لما كنت بركز معاها خصوصا في مناقشة شهود الاثبات كان دمي بيتحرق علشان كده كنت بحاول استفيد من وقتي و انا هناك في اي حاجة تانية في النوم او الجرائد او المصحف او اي حاجة مفيدة

و بقى الهدف الوحيد هو ان والدي يحس اننا معاه نوع من الدعم العنوي لان جلسات المحكمة ملهاش اي لازمة

لما رحت المحكمة امبارح ووالدي مش هناك اكتر من واحد سالني انت ايه اللي جابك؟

و كأن والدي بس هو اللي كان بيتحاكم في القضية

انا لي 40 اب و اخ بيتاحكموا في نفس القضية الظالمة دي

كلهم ابائي و اخواني الكبار رحت علشان اقف جنبهم

حتى عمو خيرت قالي المرة دي كده خالصة لينا

swahlcom_f671.jpg

الحاجة التانية اللي عايزة احكي عنها الاستاذ حازم صلاح ابو اسماعيل المحامي و عضو هيئة الدفاع

الشيخ ابن الشيخ و كان مرشح في انتخابات 2005 مجلس الشعب و اكتسح بس حصل تزوير فاضح

الحقيقة هذا الاستاذ الشيخ المحامي غير فكرتي تماما عن المحامي البارع

كتير مننا عنده صورة المحامي البارع هو المحامي الصايع صاحب الصوت العالي و الافكار الملفوفة و الملوية

حتى لو كان من الاخوان زي الاستاذ صبحي صالح مثلا

بس الحقيقة هذا الرجل هدوئه الشدييييييد و اسلوبه الراقي و تركيزه و قدرته على الوصول الى الحق بهدوء دون ضوضاء

كان مثار اعجاب كل الاخوة و حتى الشهود و القاضي نفسه

كلاكيت تاني مرة: العداد مش شغال يا فندم

نوفمبر 19, 2007

لما كتبت ان تي داتا مية مية

لقيت التعليقات بتقول انها فعلا شركة محترمة ووو….

الظاهر ان انا معرفتش اوضح قصدي

اللي حصل كالاتي

انا مشترك في اللانترنت بنظام محدد

بمعنى

اغلب الناس مشتركة مثلا بسرعة 256

و بيدفعوا 95 جنيه في الشهر

في عرض انك تدفع 45 جنيه في الشهر بس ما تستهلكش اكتر من 2 جيجا سواء داونلود او ابلود

او تدفع 90 جنيه و تاخد سرعة 512 بس ما تستهلكش اكثر من 6 جيجا سواء ابلود او دانلود

او تدفع 200 جنيه ل2 ميجا و تستهلك 15 جيجا

و كل جيجا زيادة بعد الحد المسموح بتتحاسب عليها

و ال2 ميجا في الشتراك غير المحدد تقريبا ب 800 جنيه

الموضوع بقى ان الشركة لسه ما شغلتش العداد اللي بيحسب عدد الجيجا الزيادة

معنى كده اني بتخدم سرعة اعلى بسعر اقل لحد لما العداد يشتغل

و علشان كده قلت انهم مية مية

الشهر اللي فات قالوا ان العداد هيشتغل خلال اسبوع او 10 ايام

و الشهر ده نفس الكلام برضه

انا الحقيقة ما جربتش شركات تانية علشان اقارن

بس عموما الشركة دي فيها حاجات كويسة و حاجات وحشة

بعض من عرفت قبل الاعتقال:عمو ممدوح

نوفمبر 19, 2007

زي ما قلت قبل كده

عن بعض من عرفت قبل الاعتقال

الابتلاء ده نوع من الاصطفاء

من 12 سنة تقريبا

نقلنا لشقة جديدة في مدينة نصر

و ربنا رزقنا بجيران ممتازين و كان عمو ممدوح الحسيني منهم

و كان عنده 3 اولاد في نفس السنة الدراسية اللي انا و اخواتي الاثنين فيها

و كان له عادة جميلة جدا

كان كل يوم ينزل بعد اذان الفجر

يصلي تحية المسجد و يقعد يراجع قران

و يصلي بينا الفجر

و بعد الصلاة يقعد يعمل مقراة يعلم فيها الناس قراة القران

كل يوم ما افتكرش يوم نزلت فيه و ما شفتش عمو ممدوح

 بعد الشروق يكون اخد اجر الحجة و العمرة

يخرج يروح شغله

و لما نقل من مدينة نصر من فترة

فضلت المقرأة شغالة كل يوم لحد النهاردة

عرفت بعد كده من عبدالرحمن ابنه انه بيصحى كل يوم  قبل الفجر بساعتين يصلي قيام

لدرجة ان لما جم بتوع امن الدولة يعتقلوه

عارفين ان هم ممكن يسرقوا اي حاجة يلاقوها في طريقهم

فخبوا محمولين

بس لما جه  معاد صحيان عمو ممدوح للقيام

المنبهين اللي في المحمول قعدوا يرنوا

عمو ممدوح و بابا  اصحاب جدا

لدرجة ان لما بابا لما جم يعنقلوه قالي لما نمشي كلم عمو ممدوح بلغه اني اعتقلت

و عمو ممدوح برضه قال لعبدالرحمن ابنه بلغ عمو صادق اني اعتقلت

يا رب فك اسره و اسر ابي و اسر كل مظلوم

منفوش

نوفمبر 13, 2007

الاول عايز اشكر كل الناس اللي سئلت على والدي او دعتله

سواء تركوا تعليق هنا او  في الايميل او في الفيس بوك

انا وصلت لوالدي كل الردود دي

حقيقي جسيت بصدق مشاعركم

جزاكم الله خيرا

ندخل في الموضوع

منفوش ده الاسم الحركي لمهند قبل الولادة

منفوش 

dsc015031-small-custom.jpg

مهند ابن اخوي

مريض برضه

عنده مغض شديد و خس اليومين اللي فاتوا ادعوله

الظاهر انه متاثر نفسيا علشان اللي بيحصل لجده

ادعوله

n602212412_337722_4985.jpg

الاطفال

كل واحد منهم مميز

و كل سن له جماله

مهند

ابن اخوي

رغم ان مش اول مرة حد من اخواتي يرزق بطفل

انا خال من 7 سنين

بس اول مرة ابقى عم

بس حقيقي مش هو ده الفرق

الفرق ان دي اول مرة اشوف الطفل بيكبر قدام عيني

لان اخواتي البنات عايشين برة مصر

كنت دايما بشوف مراحل

دائما بيتهالي ان ده اكثر طفل ممكن احبه في الدنيا

بس حقيقي كل واحد منهم له معزة خاصة

لما بشيل مهند بيقولولي المفروض تتكلم معاه

علشان يتعلم من كلامك

بس حقيقي انا لما بشيله

ما بعرفش اتكلم

ببقى مأخوذ

بمشاعر جارفة

بانبهار بالمعجزة دي

و لما امسك ايده اللي اصغر من صباعي

و افكر و اقول انا كنت كده في يوم من الايام

في ناس كثير بتقول انها بتحب الاطفال

بس ممكن يقعدوا معاه شوية يلعبوا معاه و يقولوا كلمتين

و لما يبتدي يعيط او يحتاج حاجة خلاص

dsc01484-custom.jpg

بس حقيقي بجد مش هزار لما ابقى مع مهند

و اسمعه و هو بيعيط بيصعب علي قوي

بس ما ابقاش منزعج من عياطه

على قلبي كانه حاجة جميلة

بس بيبقى نفسي يبطل مش علشان انا مدايق

علشان هو مدايق و تعبان

و لما يسكت و يبطل عياط

لما ببص عليه

ما شاء الله لا قوة الا بالله

ببقى مبهور بالبراءة اللي في وشه

وش عمره ما اتلوث باوحال الدنيا

بقذارات المعاصي

طاهر

برئ

جميل

مش بيقولو الجمال جمال الروح

علشان كده لا يمكن تبص في وش طفل و تكرهه

لان كلهم ارواحهم حلوة لسه طاهرة

02112007001-custom.jpg

اصابة والدي بانزلاق غضروفي شديد و تعنت في علاجه

نوفمبر 10, 2007

n602212412_346687_63322.jpg

 

صورة لوالدي في البيت قبل الاعتقال

في حاجة بس الاول عايز اشرحها
ان في المحكمة العسكرية ممنوع دخول الموبايل و الكاميرا
بس لما بنخش بنلاقي في واحد بيصور فيديو تبع المحكمة
واضح ان التسجيل ده بيتعرض على كذا جهة
واكيد منها امن الدولة

قرف

الكلمة دي هي باختصار الحالة اللي احنا بنتعامل معاها في محاولات لعلاج والدي
اللي شخص حالة والدي اطباء كانوا بيجوا معانا الزيارة
جزاهم الله خير
يعني مش ادارة السجن اللي جابينهم

 

بس كانوا بيطلبوا فحوصات و اشعة علشان يتاكدوا و يبتدوا يعالجوا على اساسها
و مش عايزين يبتدوا يوصفوا علاج الا لما تتعمل الفحوصات
و الفحوصات دي لازم تبقى في مستشفي
مش على كرسي في مكان الزيارة
المهم بعد مناوشات و حوارات كثيرة
لما القاضي العسكري سمح ل 9 بتحويلهم لمستشفى المنيل الجامعي
المفروض ادارة القضاء العسكري تبعت فاكس لادارة السجن فيه التصريح ده
بس الفاكس اللي وصل لادارة السجن كان مكتوب فيه
يتم عرضهم اولا على مستشفى السجن و طبيب السجن يحولهم لمستشفى المنيل

و مستشفى السجن دي بالمناسبة ما فهاش اي حاجة
لدرجة ان لما دكتور بيجي الزيارة ممكن يجوا يستلفوا منه جهاز الضغط
المهم المفروض بعد الفاكس ده بيجي امر الترحيلة من امن الدولة
لان امن الدولة هم فعليا اصحاب الامر و النهي في السجن
او في كل حاجة في مصرالمهم جت الترحيلة مباشرة علشان تطلع 5 من التسعة لمستشفى المنيل اللي القاضي امر بتحويلهم لمستشفى المنيل
و ده عكس الفاكس اللي جه من ادراة القضاء العسكري
بس واضح ان امن الدولة لما اتفرجوا على الشريط لقوا القاضي بيقول تحويلهم لمستشفى المنيل راحوا بعتو الترحيلة على طول
بس كانوا النفروض الترحيلة تيجي يوم الثلاثاء بعتوها الاربعاء
و كان والدي منهم

و رغم انهم طلبوا اكثر من مرة ان يتم نقلهم في عربية اسعاف او عربية مجهزة

راحوا المستشفى في عربية الترحيلات المقرفة اللي سببت اصلا لمعظم الناس المتاعب اللي في ضهرهم
راحوا المستشفى لقوا ان عيادة العظام شغالة كل ايام الاسبوع ما عدا الاربعاء و الخميس
فما كانش في حد
و رجع والدي من المشوار اكثر تعبا على الفاضي
و الغريب بقى ان ترحيلة الخميس جت برضه
رغم معرفتهم ان عيادة العظام قافلة
المهم والدي خرج في يوم ثاني بعد كده و راح المستشفى و اللاستشاري اللي كان هناك كان محترم جدا
و كشف على والدي كويس رغم الزحمة اللي كانت هناك
و قال لوالدي ان دي حاجة سيئة جدا انهم ينقولك في عربية الترحيلات
المهم كتبله على رنين مغناطيسي تاني يوم
و تاني يوم ده كان في جلسة
اللي هي الجلسة اللي عمو فتحي اصيب فيها بازمة قلبية
و اللي القاضي اصر ان كل الناس تخرج فيها
و تجاهل كل التحذيرات الطبية
و ما قعدش غير والدي علشان كان المفروض عنده ترحيلة و المهندس ايمن
المهم رحنا المستشفى علشان نقابل بابا هناك بس ما جاش
و جرينا على السجن علشان نلحق الزيارة
عرفت ان الفاكس بتاع امن الدولة ما وصلش لادارة السجن فما خرجش

 

اخر مرة بابا كان المفروض يخرج للرنين
بابا خرج بس ادراة السجون قالت تاخد كل اللي عايزين يروحوا المستشفى فقعدوا يلفوا على سجون المنطقة عقبال ما خلصوا و راحوا كانت عيادة الرنين قفلت
مش قلتكم قرف

المشكلة ان انا لما بروح الزيارة

ببقى نفسي اقعد مع والدي اطول وقت

بس عارف انه تعبان و عايزه يدخل يستريح

ما ابقاش عارف اعمل ايه
حسبي الله و نعم الوكيل

ايام في الظلام

نوفمبر 6, 2007

 

575he1.png

وحشتوني قوي

 

التليفون بقاله حوالي اسبوع و نص بايظ لان كان في كابلات اتسرقت قطعت التليفونات عن المنطقة

 

في حاجات كثير عايز احكي عنها

 

عايز احكي عن حالة والدي الصحية

 

و عايز احكي عن فرح الاخ اللي اعتقل قبل فرحه ب3 ايام و خرج ليلة الفرح

 

و المجرمين بتوع امن الدولة قلوا ادبهم عليه بشكل مؤسف

 

و عايز احكي عن انه بعد انقطاع التليفون الكهرباء قطعت

 

و تجربة العيشة في الظلام

 الكهرباء قطعت لمدة 3 ايام

طبعا كانت مشكلة كبيرة

مفيش تلاجة  و لا مذكارة بالليل و لا دش اتابع عليه الاخبار

و لا عارف اغسل و لا اكوي

و كان عندي شغل كوميبوتر كتير متعطل

و حسيت بنعمة ربنا علينا

و دعيت ربنا يخفف عن اخوانا في غزة اللي كل شوية حياتهم مهددة بسبب قطع الكهرباء مش عن بيت و لا حي ده قطاع بحاله

بمدارسه بمستشفياته بكل حاجة

بس حقيقي كانت تجربة غريبة جدا

لما يجي الليل و تلاقي مفيش نور

كنت بلاقي في الظلام ده نوع من الهدوء

حتى قبل ما اجيب الشمع

لاني ما جبتش شمع غير في اليوم الثالث

و الشمع برضه بيحسسك نوع غريب من الحميمية

ليل حقيقي مش مزيف شغال في نور طول ما انت صاحي

ليل فيه السكن اللي ربنا بيقول عنه

“فالق الاصباح و جعل الليل سكنا و الشمس و القمر حسبانا”

“هو الذي جعل لكم الليل لتسكنوا فيه والنهار مبصرا ان في ذلك لايات لقوم يسمعون”

هو ده الليل اللي بيقولو عنه ان الدين ذل بالنهار هم بالليل

ليل يثير همومك

ليل بيخاف اصحاب الضمائر المثقلة بالاخطاء

ليل بيحبه العشاق

ليل بيشتاقله العباد

تلاقيهم في النهار في شغلهم او كلياتهم او مع الناس

  و بينتظروا نهاية اليوم بفارغ الصبر

علشان يعرفوا يختلوا بربهم

ناس بيحبوا ربنا و ربنا بيحبهم

بيتكلموا عن ربنا و ربنا عزو جل بيكلم الملأ الاعلى عنهم

حتى اذا جاء الليل و خلى كل حبيب بحبيبه

و اوى كل اليف الى اليفه

نصبوا الى الله اقدامهم و فرشوا للله جباههم

يتملقون الى الله بكلامه

و يسالون ربهم بانعامه

حتى اذا اصبح الصبح ترى في وجوههم  نور من نور الله عز و جل

حتى حسيت ان صلاة الفجر لها روحانية خاصة لانها في نهاية الليل

لدرجة ان اول ليلة الكهرباء رجعت فيها كنت ساعتها في البيت لوحدي طفيت الانوار

و قعدت كده شوية في هذه الحالة من التامل

 طبعا الحمد لله ان الكهرباء رجعت لان ميبنفعش اتابع حياتي من غير كهرباء

 و كان صعب اكمل تدوين من غير كهرباء و تليفون