آآآآآآآآآآآه يا مصر

مش عارف احكيلكم عن ايه و لا ايه

 

ابتدي منين و لا اقف فين

مشاعر مختطلة كثيرة جدا كلها جواي

حزن و الم و مرارة ظلم و فخر و رضا و سكينة و غضب

مرارة مالية حلقي من ظلم بين واقع على والدي و 25 كلهم ابائي

حزن على حال بلد بيتسرق

الم على احلام بيغتالوها

فخر ان والدي هو صادق الشرقاوي

فخر اني اعتقال والدي خلاني اعرف خيرت الشاطر و يعتبرني ابنه

الم و انا شايف دموع اختي الصغيرة الحامل و هي نازلة على خدها و مش قادر اعملها او اقولها حاجة تخفف عنها

غضب من نظام مذعور بيخاف من زهراء الشاطر و يزعقلها و يخاف من خديجة حسن مالك و يضربها

Khadiga

و يترعب من اروى فرحات الطفلة الصغيرة و يجري وراها و يضربها

مش عارف و الله احكي على ايه و لا ايه

احكي على همجية الامن و سعار الضباط

اللي خلى الدنيا كلها تتاكد قد اي النظام ده مرعوب من ردة الفعل

لانه عارف انه ظالم و مستبد علشان كده مرعوب كعادة الظالم لما لا يجد حجة و لا منطق يتكلم بيه

فلا يعرف الا لغة الضرب و الهمجية و الاعتقال

عشرات من الاخوة بيضربوا و يعتقلوا

و شوية انا ماشي الاقي خديجة مالك بتعيط تسالها سمية اختي في ايه

تقولها اعتقلو احمد اخوي

قعدنا نلف كل شوية بالعربية

و شوية بكلم ماما جيهان في التليفون زوجة عمو حسن مالك

لقيتها بتعيط و بتقولي اعتقلوا  احمد و حمزة و ضربوهم و ضربوا خديجة

سكت مش عارف اقولها ايه غير اني كنت بعيط معاها

شوية و مريم جمال تاج الدين كلمت سمية اختي قالتلها بابا اتاخد و انا مش عارفة اعمل ايه

سمية قالتلها تعالي معانا

و لقينا مريم هي كمان جاية معيطة

شوية جالي خبر اعتقال 2 اعز علي من اخواتي احمد حنفي و احمد نادر

كلمت احمد نادر في  التليفون قالي احنا في عربية الترحيلات و كلمت حنفي و مقدرتش

عيطت

ما بقتش عارف اعيط على ايه

على ابوي اللي قلقان على الحكم عليه

و لا على اخواتي البنات اللي اتضربوا و اتشتموا و انا مش واقف

و لا على الاخوة اللي اعتقلوا

و لا على مرارة الظلم اللي ملت حلقي و خنقتني

و انا بحاول فهم هم الضباط دول جنسهم ايه بشر و لا حيوانات

و لا جنسيتهم ايه مصريين زينا و لا احنا اللي مش من البلد دي و لا ايه

لما اتفرقت الناس و اتضرب الاهالي و الصحفيين و الاخوة المتضامنين

مشينا و بعدنا عن مكان المحكمة و قعدنا نلف بالعربية و كلمت نادر تاني قالي ان عمو جمال كان معاهم في عربية الترحيلات و نزل هو و الصحفيين

و ان العربية مشيت بيهم من المنطقة العسكرية

الغربية ان نادر المعتقل كان بيكلمني من جوة عربية الترحيلات علشان هو اللي يطمن علي و على الاحكام

المهم بعدنا عن المحكمة و ابتدى الاهالي يتجمعوا بعيد عن المحكمة علشان يطمنوا بعض

كل ما نجمع في حتة يجي الامن المذعور المرعوب يجري يمشينا منها

و قفنا بعيد خالص عن المحكمة عند مدرسة رجاك و كان معنا الدكتور محمود غزلان عضو مكتب الارشاد اللي لسه خارج من السجن

و جه الامن يجري يلا من هنا امشو من هنا

الدكتور غزلان احنا مش هنمشي دول اخوتنا و اهلنا اللي بيتحاكموهم جوه

الدكتور غزلان المعروف عنه هدوءه الشديد و ادبه لقيته منفعل جدا

و كلاب الشرطة لا يقيمو وزن لكبير و لا صغير

الضابط قاله لو ما مشتوش من هنا هنعتقلكم

لقيت الدكتور فاتح الجاكت و قاله انت فاكر هنخاف كده خدنا يلا انا لسه خارج من السجن

و الضابط قال للعساكر شيلوه يلا ارموه في العربية لولا ان الواقفين تدخلو وبعد الضابط عنه

لكن موقفه و عدم خوفه زي كتير من الاخوان يومها هزني جدا

الرجالة طول عمرهم رجالة

المهم اتحركنا تاني ووقفنا عند مسجد و عقبال الامن ما جه كنا دخلنا المسجد علشان نصلي الظهر

كل ده و لسه ما كناش نعرف اي حاجة عن الاحكام

و فضلنا هناك بقى

و لقيت هيثم مناع كان مذهول من طريقة تعامل الامن مع الاهالي

و جالنا من نجا من الحرب من الصحفيين

و جت قوات الامن و العساكر و طوقوا المسجد

وقفنا مستنين الاحكام

المحامين ممنوعين من دخول المحكمة

المحكمة انعقدت و اصدرت احكامها في سرية شديدة منعت حتى محامي يدخل يجيب نسخة من القرار

في سابقة لم تحدث حتى في تاريخ المحاكم العسكرية

و ده اكبر دليل على رعب النظام و خوفه

لانه لو كان عادل في احكامه ليه خايف من الاهالي و الصحفيين و المحامين

الساعة 2 ظهرا و لسه مفيش خبر

ماما جيهان تعبانة جدا جدا و و تقولي انا حاسة اننا مش في بلدنا

هم بيعملو معانا كه ليه تقولي كده و هي بتعيط

و وصلت الاحكام

سربها امن المحكمة للمحامين برة

ووقفنا نسمع الاحكام على ابائنا

مش قادر اوصف اللحظة دي

لقيت هند شوشة وقعت على الارض لما عرفت ان ابوها اخد 5 سنين و قاعدة تعيط

بنات الشاطر دموعهم مغرقة النقاب

خديجة مالك مش قادرة تتماسك و قاعدة تعيط و اخوتها هدو فيها

 

 

بنت عصام حشيش زي كل الناس اللي وقفت دموع الظلم و القهر غرقت وشهم 

حتى اللي ابائهم اخدو براءة كانو بيعيطو زينا

طنط امال زوجة احمد النحاس اللي اخد براءة كل ما تسمع لاحكام على حد من عليتنا الكبيرة تعيط

احمد محمد بليغ االي ابوه اخد براءة اخدني بالحضن و كان بيعيط اكتر مني

فاطمة بليغ قعدت على الارض تعيط

مصطفى عصام عبدالمحسن ده بقى لسع

لقيت سمية اختي الصغيرة قاعدة تعيط اخدتها في حضني و انا مش عارف اقولها ايه

بس والله و الله و الله

مصر هتفضل غالية علي

و الله ما احنا سايبنها للحرامية

Advertisements

19 تعليق to “آآآآآآآآآآآه يا مصر”

  1. أروي الطويل Says:

    “وإصبروا وصابروا وأنتم الأعلون …”
    ” إنما يوفي الصابرون أجرهم بغير حساب ….”
    حسبنا الله ونعم الوكيل ..نعم المولي ونعم النصير ..
    والحمد لله علي كل حال

  2. آية الفقي Says:

    حسبي الله ونعم الوكيل

    مش لاقية كلام

  3. ayad Says:

    يا عابد الحرمين لو ابصرتنا لعلمت انك بالعبادة تلعب
    من كان يخضب خده بدموعه فلحومنا بدمائنا تتخضب

    الى كل مسؤول ( او يدعي ) يصرح من خارج بلاده /
    الى كل من سكن شارم الشيخ او قبور الفراعنة /
    الى كل من يقول ولايفعل !!!!!!

  4. غير معروف Says:

    حسبى الله ونعم الوكيل وربنا معاكو ان شاء الله ويصبركوا ويصبرنا والحمد لله على كل شىء وياريت اعرف هيا سمية كويسة ولا لا علشان انا مش عارفة اوصلها خالص وجزاكم الله خيرا

  5. رحاب عامر Says:

    وجزاكم الله خيرا

  6. محمد عباس Says:

    حسبنا الله ونعم الوكيل

    ولكن نتذكر وصية المولى عز وجل”يا أيها الذين آمنو اصبروا وصابروا و رابطوا و اتقوا الله …..”

    ولا نقول الا ” ان فرعون علا في الأرض وجعل أهلها شيعا ….” والله انا المنتصرون

    قلوبنا معكم

    دعواتنا معكم

    دموعنا تجري سيولا من حزننا على ابائنا

  7. غير معروف Says:

    انا مش قادر اقول حسبى الله و نعم الوكيل .. و مش قادر احس بأى حاجة لأنى فعلا ً فقدت الإحساس خلاص.. لما يبقى كل الناس عارفة الحقيقة و تتزيف قدام عينيها لازم اشك فى حواسى .. لما كل حاجة تأكد إن هانى سرور بيتلاعب بينا (هايدلينا) و فى الأخر و فى نفس يوم الحكم فى العسكرية كل المتهمين فى قضية أكياس الدم الفاسدة و المعدات الطبية الملوثة يخدوا براءة و افراج من محكمة جنايات القاهرة مع زفة اعلامية محصلتشى للنصر وان الحقيقة لازم تبان فى حين ان كل الناس عارفة حقيقة اللى بيعملوه و فى نفس الوقت الابرياء يخدوا أحكام سَلطة من سْلطة بس للاسف دى حتى محصاتشى سلطة طحينة .. و محدش عارف ليه دا خد حكم و ليه دا خد براءة .. ليه انا جوة القفص و غيرى برة.. وسط سحابة تعتيم بدون حدود ..
    لازم اقول يا ليتنى كنت برازيلى .. او ماليزى.. و لا حتى صينى كان يبقالى تمن .. و اللى مش عاجبة مش هيقدر يوزن برة علشان احنا اللى خرمنا الربع جنيه علشان نوفر…. مش عارف اقول ايه .. شكلى اتلحست ..

  8. غير معروف Says:

    من فترة قريبة و انا ماشى قابلت واحد اعرفة مكنتش شفته من زمن.. اصله كان معتقل علشان بيشكوا فى افكاره و مقدروش يحسبوه على اى تيار.. قالى كلمة انا كنت هضعف قبل مدخل المعتقل و جه المعتقل دى علمنى كتير زى اللى حصل مع سيدنا يوسف مع الفارق طبعا … و كمان قالى ان الناس فوق خايفة من الاخوان بس مش تقدر تعمل حاجة اكتر من انها تقص ريشهم يعنى مش ممكن تقضى عليهم لان وجودهم عامل توازن و لان ليهم دور مهم فى التنمية و الاصلاح بجد و مينفعشى تسيبهم زى مهما علشان لو سابتهم هيشلوا اللى فوق .. يعنى لو سابوهم هييكبروا و يكلوهم و لو شالوهم الصغار هيتقلبوا و مش هيلاقوا حد يلمهم يبقى لازم يفضل الاخوان موجودين بس مقصوص ريشهم بحيث ميعرفوش يطيروا و يستنوا لما ماما ترميلهم القمح علشان ياكلوا … يا ترى تخاريف صاحبى حقيقة.. و لا دا من اثر الكهربا اللى خدها

  9. أحمد عبد الفتاح Says:

    حسبنا الله ونعم الوكيل بجد
    الكل كان يومها مليان احاسيس غريبة متناقضة
    بس القاسم المشترك أن الكل كان مومن بالله وان ده قدره

  10. حسن محمود Says:

    حسبنا الله ونعم الوكيل

  11. روضة Says:

    مفيش حاجة ممكن تقال في مثل تلك الظروف اللي بتعجز الكلمات عن وصفها

    لكن كل اللي اقدر اقوله

    ربنا يرزقكم الثبات ، ويربط على قلوبكم

    ويريكم ايه في كل من أذوكم ، ويم أسود في كل ظالم جبار عنيد

  12. إسلام ناجح Says:

    وأنا باقرا الكلام ده قعدت أعيط
    ومن يوم أول امبارح كده
    مش عارف أعمل إيه ولا أقول

    حسبنا الله ونعم الوكيل

  13. غير معروف Says:

    اختنق الكلام في قلبي وأشعر كأن صدري أوشك على الانفجار حزنا على ما حدث وما يحدث وما سيحدث
    حسبي الله ونعم الوكيل

  14. انسانة مسلمة Says:

    بسم الله الرحمن الرحيم

    إنا لله وإنا إليه راجعون

    حسبي الله ونعم الوكيل

    ربنا يرحمهم برحمته الواسعة ويشفي غليل صدورهم وينصرهم ويفرج عنهم ويؤنسهم بقربه

    ويصبرم ويقويكم ويقوي ايمانكم

    بصراحة حاسه اني بقرا سيناريو بايخ جدا مش حقيقة …بجد حاجة لا يصدقها عقل

    ايه اللي بيحصل ده ؟؟؟؟؟

    بجد فيه ايه …

    حسبي الله ونعم الوكيل

  15. محمد الانصاري Says:

    ايه يا عم عبد الله
    مش كفايه احساسي بالذنب واننا مقصر انته لازم تزود الحساس ده

    عموما اخبار امتحناتك ايه

  16. فدوى خالد Says:

    والله بجد الواحد مش عارف يرد على الكلام ده يقول ايه والله الواحد قلبه بيتقطع من كثرة الظلم البين انا لما شوفت سمية في الجزيرة كان هاين عليها انزل اضرب كل السفلة دول بالرصاص حسبنا الله ونعم الوكيل اللهم عليك بمن طغى وبغى وتجبر وتكبر وافترى علينا وعليهم يارب انصرنا يارب عليهم يارب انتقم منهم يارب ثبتهم وثبت اهاليهم

  17. كتابات هندسية Says:

    ربنا يعينا جميعاً على اللي بيحصل

    عبارة-دويقة-ملجس شورى-مسرح قومي-ولسه ولسه

    🙂

  18. أخت مسلمة Says:

    مصر هتفضل غالية علي
    و الله ما احنا سايبنها للحرامية

    …………………………………….
    ……………………….
    ……………..
    …..
    ..
    .

    قد أوجزت فأبلغت
    هذا مالن يفهموه أبدا
    الا بمواقف الرجال أمثال أبيك واخوانهم وازواجهم واولادهم ..

  19. غير معروف Says:

    حملة مقاطعة الفن الهابط
    بسم الله الرحمن الرحيم

    الحملة عبارة عن مقاطعة تامة للسينمات ليه بقى ؟
    احنا عمالين نشتكي من القذارات الي بنشوفها في الافلام و الموضوع بيتحول من سىء لأسوأ .. و بنشتكي من الوضع الغريب الي يخلي واحد ممثل هايف مليونير و آلاف الخريجين من طب و هندسة و غيرهم مرتباتهم ملاليم دا لو لقوا شغل أصلا ..
    الطبيعي اننا بنلوم الحكومة كالعادة على الوضع دا .. بس لأ المسئولية الأكبر علينا احنا مش على الحكومة !!
    لأن الموضوع عرض و طلب .. المنتجين بيعملوا الأفلام بالشكل دا لأننا عايزين دا و لأننا بنروح السينمات و بندفع . لو فكرنا في الموضوع دا هنحس بإهانة كبيرة قوي لينا !!
    عشان كدا لازم نغير الوضع دا بإدينا و نقول لاااااا للإباحية .. لا للفن الهابط .. لا للهيافة .
    خلينا نبقى عمليين و نحسبها .. لو افترضنا متوسط دخول السينما للواحد مننا مرة واحدة شهريا و بيدفع فيها 20 جنيه
    يبقى لو وصلنا ل 100000 عضو في الحملة مقاطعين السينما يبقى احنا بنخسرهم شهريا 2000000 ( 2 مليون جنيه) .
    و على الأقل قوي نبقى وصلنا صوتنا وعملنا الي علينا ..
    و مطالبنا فن محترم , يحترم عقلياتنا و قيمنا و ديننا
    خليك ايجابي متقولش “هو جت عليا يعني ماهو ناس كتير بتروح السينما”
    ايوة على الأقل عملت الى تقدر عليه .

    مهم جدا: قبل ماتنضم للحملة وتقاطع السينما لازم الأول تكون رافض الافلام دي من جواك … يعني لازم تكون مش عايز الافلام دي بجد و عايز فن محترم و هادف .
    و افتكر : “إن الذين يحبون أن تشيع الفاحشة في الذين آمنوا لهم عذاب أليم في الدنيا و الآخرة والله يعلم وأنتم لا تعلمون

    http://www.facebook.com/home.php?ref=home#/group.php?gid=44104217671&ref=ts

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s


%d مدونون معجبون بهذه: