أرشيف أكتوبر, 2007
انا اسف
أكتوبر 28, 2007Te-Data 100%
أكتوبر 21, 2007
تي داتا دي يا جماعة جامدة جدا
و اي حد يقول غير كده يبقى غلطان
فاكرين الهوجة الجامدة اللي حصلت على موضوع تحديد الانترنت بعدد معين من الجيجا
الموضوع ده اصلا موجود من فترة بس كاختيار و الهوجة اللي حصلت انه كان هيبقى اجباري
المهم انا اصلا اشتركت بنظام الجيجا المحددة دي علشان اقدر اخد سرعة اعلى مع سعر معقول
المهم انت عارفين اول ما الواحد ينقل من استخدام التليفون الى استخدام دي اس ال او يغير من سرعة بطيئة الى سرعة اعلى
بيبقى محدث نعمة
و بيجيله حالة شره داونلودي
بتخليه ينزل اي حاجة في اي حتة و يستمتع و هو بيتفرج على مؤشر الداونلود السريع
الحالة دي يتروح بعد شوية بس بتفضل عند ناس
المهم الحالة دي جتلي في اول اسبوعين و انا كنت متاكد اني في الشهر الاولاني اكيد عديت الجيجا المحددة لي
و ده معناه 10 جنيه على كل جيجا زيادة
انا كنت دافع مع التعاقد 3 شهور المهم لسه خالصين من كام يوم
اتصلت بخدمة العملاء اسالهم و انا خايف كده عندي كام جيجا زيادة
اللي ردت علي قالتلي
لسه يا فندم النظام اللي بحسب عدد الجيجا الزيادة ما اتركبش
و غالبا هيركب كمان اسبوع
هييييييييييييييييييييييييييه
يعني مفيش حاجة زيادة و لا اي حاجة
لحد دلوقتي يعني
دي داتا شكرا ليكي
و اتمنى انك تتاخري دايما في الحاجات اللي ممكن تدفعني فلوس
خريف
أكتوبر 16, 2007 
مش عارف اوصفه
الخريف بحبه بعشقه
الجو مش حر خنقة و لا برد صقيع
لان حتى الربيع في مصر مرتبط معايا برياح الخمسين
الجو في نسمة هوا مع لسعة برد
لسعة تعذبك بالف سوط
ابقى نفسي اعمل مشاويري كلها مشي
من غير مواصلات و لا عربية
بس امشي في الشارع
لو كان عندي وقت
امشي في الشارع املا صدري من هوا الخريف
تحس الهوا نفسه ليه ريحة
بداية الدراسة و تلاقي تلميذ مكافح مش باين من الارض شايل شنطة على ضهره قده مرتين
واقف الساعة 5 الصبح مستني الاتوبيس
ياااااااه الخريف
تملا صدرك من هوا الخريف
و يطلع مع الزفير آهات ما تعرفلهاش سبب
تلاقي دموع بتنزل من غير سبب
تحس مع دموعك بتنزل بتسد ثقب مش عارف هو فين
الخريف تحس معاه باحساس عميق بس مش قادر توصفه
و تسال نفسك هو انا بس اللي حاسس كده؟
يريد الله ان يتوب عليكم
أكتوبر 15, 2007كنت كتبت قبل كده عندما لا يريدك الله
و قلت اننا نحلق الى الله عز و جل بجناحي الخوف و الرجاء
الواحد يهم بمعصية فتمنعه ظروفه
او ينام او تخلص الفلوس او الكهرباء تقطع او العربية تقطع
اي حاجة ربنا يقدرها علشان تمنعك من المعصية
او حتى المعصية تبقى قدامك و تشعر نفسك بالنفور و القرف منها
المشكلة اننا احيانا نتعامى و نصر على المعصية و نفضل نحاول و ربنا الغني عنا يمنعنا
ساعتها اتذكر مع الفارق طبعا قول الله عز و جل عن سيدنا يوسف
“و لقد همت به و هم بها لولا ان رءا برهان ربه”
و بعد ان يمر الموقف تشعر بهذه اللذة
لذة الانتصار على شيطانك و نفسك الامارة بالسوء
و لكن اوعى تفتكر ده علشان انت جامد لانك كنت بتتعرض لنفس الموقف و تقع في المعصية
لكن بفضل الله عز و جل
قل بفضل الله و برحمته فبذلك فليفرحوا
و هكذا يقول الله عز و جل في اية اخري
“يريد الله ان يتوب عليكم و يريد الذين يتبعون الشهوات ان تميلو ميلا عظيما”
لكن مع هذه الاية اتذكر مقولة للشيخ اللي بحبه جدا الشيخ محمد حسين يعقوب
صحيح ان ربنا غفور و رحيم لكنه عزيز لا يقبل الا على من يقبل عليه
لذا في الحديث القدسي المشهور
من تقرب الي شبرا تقربت اليه ذراعا و من تقرب الي ذراعا تقربت اليه باعا و من اتاني يمشي اتيته هرولة
في كل هذا دائما ما يبدا العبد على ربه العزيز
انت تقرب تقدم و الله سياخذ بيدك
و لو في حد ما لحقش يتوب في رمضان صحيح فاته خير كثير لكن لم يغلق التوبة حتى تغرغر
والدي غاب عن الجلسة لمرضه الشديد
أكتوبر 9, 2007 
والدي وهو خارج من المحكمة وسط الحراسة المشددة
صورة من الارشيف
والدي النهاردة ما حضرش لاول مرة جلسة المحكمة العسكرية بسبب تعبه الشديد
والدي غاب عن الجلسة لاشتباه باصابته بانزلاق غضروفي
و هو كان ضهره بيؤلمه من فترة
لكن الالم زاد عليه في الفترة الاخيرة جدا
لدرجة انه اخر مرة و احنا في زيارته كان ضهره بيوجعه جدا لما يتحرك حركة بسيطة
و ده طبعا بسبب ظروف الرعاية الصحية في السجن نفسه
او قفص الاتهام الحقير الضيق جدا جدا
و الذي يقضوا به ساعات طوال خلال المحاكمة لا يستطيعون الجلوس او الوقوف ناهيك عن الحركة اصل
احساس بالقلق الشديد على والدي
نفسي انزل اروح اكسر السور او انط من فوقه ادخل اطلع والدي و كل المظلومين معاه
او على الاقل اقعد جنبه اطمن عليه
حسبي الله و نعم الوكيل
احساس بحسرة على حال بلد احسن ناس و اشرف ناس و اطهر ناس فيها
في سجون يتالمون و الحرامية و النصابيين و القتلة و المزورين و المرتشين احرار
حسبي الله و نعم الوكيل
احساس بالعجز و قلة الحيلة و انا ارى ابي يتالم و لا استطيع له شيئا
الا الدعاء فهو حيلة من لا حيلة له
اللهم انت حسبي و نعم الوكييل
اللهم اشفي ابي شفاء لا يغادر سقما
اللهم اشفه بشفاءك و داوه بدوائك
اللهم رب الناس اذب الباس اشفي انت الشافي شفاءا لا يغادر سقما
اللهم رد الينا ابي و فك اسره و اشف مرضه و مرضى المسلمين
لا تنسوا ابي من دعائكم
و لا تنسوا المهندس ايمن عبدالغني لاصابته من قبل بانزلاق غضروفي و تغيبه عن جسلتين قبل اليوم
و لا تنسو ان يرفع الله عن مصر الظلم و البلاء
عندما لا يريدك الله
أكتوبر 1, 2007ابقى نازل رايح مشوار اسعى في الخير
و بعدين يجيلي تعب مفاجئ يمنعني انزل
او الراجل اللي كنت رايح معاه كاوتش عربيته نام و عقبال ما غيرناه كان الوقت عدى
او عربيته عطلت و مش عايزة تدور
او في حادثة على الطريق موقفة السكة
او افهم ان المعاد الساعة 10 و يطلع انه كان الساعة 7
او انزل ما الاقيش مواصلات
او انام و اصحا بعد المعاد
او اي حاجة المهم منعتني اني الحق الخير اللي كنت رايح اعمله اي كان الخير ايه
ناس كتير بتقولي ان شاء تكون اخدت الاجر بالنية
و انا فعلا بدعي ربنا انه يكتبلي الاجر حتى لو لم اتم العمل غصبا عني
لكن في آية تشيب
ربنا بتكلم عن المنافقين قيقول
“الله عز و جل “ولكن كره الله انبعاثهم فثبطهم و قيل اقعدوا مع القاعدين
و رغم ان في ايات تانية كثيرة و احاديث تتحدث عن حب الله للعبد و فرحه عز و جل بالتوبة
لكن الاية دي بتخوف
و هكذا نطير الى الله بجناحي الخوف و الرجاء
فلا يغلب علينا الخوف حتى نيأس
و لا يغلب علينا الرجاء حتى نأمن مكر الله
يا رب لا تكره انبعاثي في الخير و لا تثبطني
